Clinton ne udhetim te evropes

Duket se nuk është vetëm kryeministri i Kosovës, Hashim Thaçi ai që ngatërron emrat e personaliteteve që i takon. Mediat botërore kanë raportuar për një sërë gabimesh që pikërisht sekretarja amerikane e shtetit, Hillary Clinton (të cilën Thaçi e ngatërroi me Madeline Albright) ka bërë gjatë vizitës së saj në Evropë. Politikanja me përvojë ka ngatërruar emrat e dy funksionarve të lartë evropianë. Në konferencën për shtyp me Përfaqësuesin e Lartë për Politikë të Jashtme dhe Siguri, Javier Solana, i është referuar me “zoti Solano”. Ndërkohë, e ka “shndërruar” në mashkull, Komisioneren për Politikë të Jashtme të Komisionit Evropian, Benita Ferrero-Waldner, duke i thënë “Benito”. Sikur të mos mjaftonte kjo, Clinton bëri një gafë të rëndë gjatë një fjalimi para të rinjve në Parlamentin Evropian. Tha se demokracia amerikane është me e vjetër se ajo evropiane!!! “Unë vërtetë kurrë se kam besuar demokracinë shumëpartiake. Është vështirë për dy parti që të arrijnë një zgjidhje, dhe e them këtë me shumë respekt, sepse ndjehem njëjtë edhe për demokracinë tonë, që është shumë më e vjetër sesa demokracia evropiane”, ka thënë Clinton. Shumë evropianë të rinj kanë luhatur kokën kur e kanë dëgjuar një gjë të tillë, duke e pasur parasysh atdheun e demokracisë – Greqinë e lashtë. Clinton u skuq edhe pas takimit me homologun e saj rus Sergei Lavrov. Sekretarja amerikane e Shtetit, i dhuroi Lavrovit një buton me mbishkrimin në anglisht “Reset”, ose Nisje nga fillimi. Por, përkthimi që kishin zgjedhur amerikanët në rusisht ishte “peregruzka”, që përkthehet si “i tejmbushur”, e jo rinisje. Gazeta “Kommersant” doli me titullin “Sergei Lavrov e Hillary Clinton shtypin butonin e gabuar”.