Bajramaj në Potsdam

atmire Bajramaj ka nënshkruar kontratë dyvjeçare me klubin gjerman, FFC Turbine Potsdam. Futbollistja kosovare, e cila aktualisht luan në Duisburg, do t’i bashkohet klubit të ri nga sezoni i ardhshëm. Trajneri i Potsdamit, Bernd Schroder, ndihet mjaft i lumtur që sezonin e ardhshëm do ta ketë në dispozicion dyshen e Duisburgut, Fatmire Bajramaj-Corina Schroder.

Fatmire Bajramaj do t’i bashkohet skuadrës gjermane 1. FFC Turbine Potsdam, nga sezoni i ardhshëm. Futbollistja kosovare, e cila aktualisht aktivizohet në ekipin FCR 2001 Duisburg, ka arritur marrëveshje me udhëheqësit e Potsdamit, të hënën.

Sulmuesja Bajramaj, së bashku me bashkëlojtaren e saj, Corina Schroder, kanë nënshkruar kontratë dyvjeçare me Potsdamin, deri më 30 qershor të vitit 2011, shkruante të hënën në ueb faqen zyrtare të Potsdamit.

Trajneri i Turbine Potsdamit, Bernd Schroder, ndihet mjaft i lumtur që sezonin e ardhshëm do t’i ketë në dispozicion, përfaqësuesen gjermane Bajramaj dhe përfaqësuesen e U23 të Gjermanisë, Schroder.

“Ne jemi mjaft të lumtur që kemi arritur t’i transferojmë këto dy futbolliste, për të cilat ishin të interesuara edhe klube të tjera. Ne i kemi vëzhguar Lirën dhe Corinan dhe ishim të bindur se këto të dyja do të përshtaten në klubin tonë të ri dhe në sistemin tonë të lojës. Potsdam është adresë e mirë, shpresoj që të dyja të kënaqen këtu”, deklaroi trajneri me eksperiencë, Schroder.

Klubi aktual i Bajramajt, FCR Duisburg, aktualisht prin në Bundesliga 1 gjermane me 35 pikë, sa ka edhe klubi i saj i ardhshëm 1. FFC Turbine Potsdam, i cili megjithatë ka golaverazh më të dobët, gjashtë javë pa përfunduar sezoni. Pikërisht të dielën u takuan këto dy skuadra. Duisburg u mposht në shtëpi 0:3 nga Turbine Potsdam.

E lindur më 1 prill të vitit 1988 në Gjurakovc, 20-vjeçarja Bajramaj, me Gjermaninë ishte shpallur kampione e botës në vitin 2007, ndërsa një vit më vonë, dygolëshi i saj ia solli Gjermanisë medaljen e bronztë, pasi e mposhti Japoninë në finalen e vogël, përkatësisht në luftën për vendin e tretë.

Më parë, Bajramaj ishte pjesë e kategorive të ndryshme të përfaqësueses gjermane, si U20 (4 ndeshje), U19 (16 sish), U17 (4), U15 (2), derisa me U19 e kishte fituar titullin e kampionit të Evropës në vitin 2006.

Fillimisht, Bajramaj, e cila pas një jave i mbush 21 vjet, ishte pjesë e skuadrave DJK/VfL Giesenkirchen e FSC Monchengladbach, para se të transferohej në vitin 2004 te FCR 2001 Duisburg, me të cilin ka kontratë deri në verë të këtij viti.