Vjen Opera 10 Beta 1

Kompania norvegjeze Opera Software me vite të tëra po përpiqet të arrij konkurrentët e saj në treg, mirëpo përkundër karakteristikave të mira të softuerit të saj, kjo nuk po i shkon edhe aq për dore.
Versioni më i ri i Operas, i paraqitur në 10 Beta 1, do të mund t’i sillte kompanisë ndonjë përqindje më të madhe.

Opera më e re u ofron përdoruesve paketën e përmirësuar të aplikacioneve të uebit në një vend – shfletues klasik i përmbajtjeve të internetit, aplikim të postës elektronike, klient RSS dhe aplikacion për shkarkimin e dosjeve torrent.

Pos kësaj, Opera i është nënshtruar edhe disa ndryshimeve kozmetike, kështu që pamja standarde e shfletuesit do të thoshim se është modernizuar. Sipas paralajmërimeve nga tabori i Operas, pamja e këtij shfletuesi në fund do të jetë edhe më e bukur.

Nga shtojcat standarde me të cilat përdoruesit tanimë janë mësuar brenda shfletuesit gjendet opsioni Speed Dial i cili tani është rritur në 25 faqe maksimale në paraqitje, derisa edhe vet pamja mund të personalizohet në masë të madhe. Madje i është përmirësuar edhe mënyra e punës Opera Turbo e cila do të jetë shumë e dobishme për përdoruesit me lidhje të dobëta të internetit.

Operan 10 Beta 1 mund ta shkarkoni nga adresa www.opera.com/browser/download