Kosova u përfaqësua si shtet i pavarur

Kosova është përfaqësuar si shtet i pavarur dhe sovran në takimin joformal të ministrave të punëve të jashtme të Bashkimit Evropian, të shtunën, në Hluboka nad Vltavou të Çekisë, ka thënë shefi i diplomacisë kosovare, Skender Hyseni, pas kthimit të tij në Prishtinë.
Ministri i Punëve të Jashtme të Kosovës ka thënë se, shefi i UNMIK-ut Lamberto Zannier në këtë takim ka marrë pjesë në “cilësinë e vëzhguesit” – ndërsa ka shtuar se vendit tonë i është hapur rruga për të qenë pjesë e procesit të stabilizim-asocimit.

Hyseni po ashtu ka shpjeguar se, Kosova pritet të jetë pjesë e shteteve që do të përfitojnë nga lehtësimi i vizave, ndërsa ka bërë të ditur se pasaportën e Kosovës shumë shpejt do ta njohë edhe Bosnje-Hercegovina.

Ministri Hyseni ka marrë pjesë në takimin e ministrave të BE-së, pas përfundimit të vizitës së tij në New York, ku mori pjesë në mbledhjen e Këshillit të Sigurimit të OKB-së për Kosovën, ku edhe zhvilloi dhjetëra takime me delegacione të vendeve të ndryshme të botës.